Ua sauni le tina 32 tausaga le matua o Nalama Sandy Talia o Sapapalii ma Foua i Salelologa, e tali i le moliaga o le ave taavale faatamala na mafua ai le maliu o se alii, o ia lea o Chris Fasavalu Silao o Lalomalava ma Falelatai i le aso 10 o Tesema o le tausaga na tea nei.
O le Aso Gafua o lenei vaiaso ina ua toe faaauau galuega masani a le faamasinoga na tulai mo le taimi muamua lea tina.
Ua talia le talosaga a leoleo e tuu atu i le vaiaso fou le mataupu sei talia moliaga faaiu ma tapena ai foi se tali a le tina o Nalama.
O se vaega o le auala i Sapulu Salelologa na tupu ai le faalavelave, e pei ona faailoa e leoleo i le feiloaiga masani ma tusitala i le faaiuga o le tausaga na tea nei, na solomuli le taavale a le tina ae aafia ai lē ua maliu.
O se taavale totogi poo se rental na faafoe e lē ua molia i le aso na tupu ai le faalavelave.
O loo tatala lea tina i tua i aiaiga masani o le saini i le ofisa o leoleo i Tuasivi ma taofia lona tusifolau.
