O pauta faasāina o le ‘aisa poo le methamphetamine lea na maua i ni oloa sa faaulufale mai i lo tatou atunuu mai Amerika Samoa i le masina na te’a nei o Novema, o le Aso Gafua o lenei vaiaso na tutula’i ai i le Faamasinoga Maualuga i latou e to’atolu o loo molia ai e leoleo.
O le alii o Taylor Victor Crichton poo Taylor Victor Tauauve’a o Vaitele Uta ma Fasitoo Uta ua 36 tausaga o lona matua o loo molia i le faaulufale ma le umia o le 1.4 kilokalama o le ‘aisa lea na nanā mai i totonu o se pusamoa.
E le’i tuuina atu sana tali i moliaga ona e le’i mae’a faamautū moliaga a leoleo ma ua faaauau ona taofia pea i le vaaiga a leoleo.
O le alii o Filipo Filipo poo Filipo Filipo Pitolau Tago e 38 tausaga le matua o Magiagi, Lalovaea, Samusu, ma Fogatuli i Savaii, sa tutula’i ma le tama’ita’i Filipino 41 tausaga le matua o Ana Belinda Baguisa Consepcion o Vaimoso ma Filipaina i moliaga foi o le la faaulufale ma le umia o le pauta faasāina o le ‘aisa e tusa lona mamafa ma le 99 kalama lea na aumai faananā i totonu o se apa susu pauta e faasusu ai ipu kofe vevela.
O loo molia foi i lo la umia o ni mea faitino e fesoota’i le faaaogāina o le ‘aisa.
E leai ni a la tali ua tuuina atu ona e le’i faamautūina moliaga a leoleo.
O Filipo ua nofo taofia pea i le vaaiga a leoleo i le falepuipui i Tanumalala ae o le tama’ita’i ua tatala i tua i ni aiaiga e pei o le saini i le ofisa o leoleo i Apia.
O ia matāupu tau faamasinoga e lua e aafia ai fualaau faasāina o le a toe fofogaina i le Aso Gafua a sau mo leoleo e tuuina atu ai moliaga faai’u ma tuuina atu ai loa ni tali a i latou ua molia.
