O Aukilani lea ua maua lona avanoa i le faatulagana o aai e 10 pito i luga i le lalolagi e fiafia tagata e aumau ai.

Fai mai o le 2023 Global Liveability Index ua faamauina ai o Aukilani ma Osaka i Iapani o loo tutusa i le tulaga 10.

O le isi aai o Ueligitone lea ua see ane nei i le tulaga 23, lona uiga ua 35 laasaga ua sili ai i le tausaga nei nai lo le tausaga ua tea.

E maualuga le faatulagana lea pe a fua i le aofia o aai o le lalolagi atoa. O le aai o Melepone i Ausetalia o loo i le tulaga 3 ae tulaga fā ai Sini.

O lea faatulagana e aofia ai aai e 173 i le lalolagi ma e silasila ai i vaega e pei o le mautu o le aai i tulaga tau soifua maloloina aganuu ma le siosiomaga, aoaoga ma le infrastructure. 

O le aai o Vienna i Austria o loo tumau pea i le numera muamua ae o le aai o Tamaseko poo Damascus o loo i le pito i lalo o le lisi.