Ua ese le laasaga lea ua oo iai i latou e finauina ni gaioiga e faia i le suiga o le tau, climate change activists i Sini nei ina ua faatino le latou folafolaga na faia mai i le vaiaso talu ai e faapea o le aso lea o le a faatino ai a latou gaioiga e finauina ai le latou mau ma o le a avea ma faalavelave i tagata. 

O le aso lava na saisai ai e se tasi o tamaitai mai le kulupu lea, lona tagata i se taavale na poloka ai le auala i Sini, ua saisai lima i le foeuli o le taavale sa faapaka i le ogatotonu o laina e aga’i i le itu i Saute o le auala aga’i atu i le Harbour Tunnel. 

O le tamaitai 22 tausaga lea ua lipotia na ia pu’eina lona ata a o saofa’i i le nofoa o le avetaavale ma lana faamatalaga ua ia faia lea gaioiga e faailoa ai lona tetee i le leai o se gaioiga o faia i aafiaga o suiga o le tau i le konetineta.  

I lea video o loo faalogoina ai le feei ane o le to’atele o tagata ua poloka uma ai a latou taavale ona o gaioiga a lea tamaitai, o ia le isi e atoa iai le to’a 11 o i latou na pu’eina e leoleo i le taeao analeila. 

O le kulupu lea o le Blockade Australia ua fuafua e faaauau pea a latou gaioiga faapea i le vaiaso atoa Ienei.