Na molimauina e le toatele e le gata o i latou na maimoaina le taamilosaga i Hong Kong ae faapea tagata Samoa i le lalolagi atoa le mataina o taumafaiga a alo ma tamafanau a le Manu Samoa taitoafitu i le faaiuga o le vaiaso. 

E ui e le’i maua se avanoa e taaalo ai i le suega siamupini mo ipu o le taamilosaga i Hong Kong ae na matua’i faamalieina le tapuaiga a Samoa i a latou taumafaiga. Na tulaga muamua Samoa i lana pulu (Pool A) lea na ia faatoilalo ai le ‘au a Niu Sila i ai e 24 i le 0.  

Mataina le tali atu foi a Samoa i le ‘au a Ausetalia lea na o latou manumalo ai foi i ‘ai e 22 i le 17. Sosoo ai ma le taaloga mulimuli ma Hong Kong lea foi na suipi ai le Manu Samoa i ‘ai e 31 – 15. 

Na saofagā atu Samoa i le Quarter Final ma feiloai ai ma le ‘au malosi  a Argentina, o se taaloga finau tele lea na faaopoopo ai le taimi i le afa mulimuli ona o le tau fai tutusa o ‘ai 14 – 14. Peitai na toe laasia e Samoa le laina sikoa, maua ai ‘ai e 19 – 14 a Argentina ma maua ai le avanoa e ausia ai le Semi Finals lea na taaalo ai ma Fiti. 

Na matauina le malosi tele o le finau a Fiti ma o latou faatoilalo ai le Manu Samoa i ‘ai e 17 – 7 ma see atu ai loa Samoa e feiloai ma Farani e saili ai le tulaga 3 ma le 4. I le faaiuga o lea taaloga na manumalo ai Farani i ‘ai e 19 – 17 ma tulai mai ai loa Samoa I le tulaga 4 mo le taamilosaga i Hong Kong. 

I le faatulagana atoa i le mae’a ai o lea taamilosaga ua tulai mai ai foi Samoa i le tulaga 4 ma ua mae’a ona filifili foi pulu e taaalo ai mo le isi taamilosaga o loo loma nei i Dubai. O lea taamilosaga o loo iai Samoa i le Pulu D faatasi ai ma USA, Kanata, ma Iapani.