O le atina’e tau pisinisi laiti e pei o maketi tu auala o loo faatau atu ai i le lautele o le atunuu fua o laau tau faato’aga, faapea isi oloa o loo gaosia lava e o tatou tagata, o se isi lea o fesoasoani i le tamaoaiga o o tatou tagata i nuu ma afio’aga.
O le fesoasoani a le Iuni a Europa ma le Faalapotopotoga o Taumafa ma Faato’aga a le Lalolagi ua auala mai se fesoasoani mo ia pisinisi laiti ma ua maua ai e tagata e ana ia maketi tu auala fesoasoani o mea faigaluega e fausia lelei ai nofoaga o loo faatino ai latou maketi o loo faatau ai fua o faaeleeleaga ina ia mamā ma saogalemu.
Ua ogatasi lea polokalame fesoasoani e pei ona faailoa e le Minisita o Faato’aga ma Faigafaiva ma manulauti o fuafuaga alualu mamao a le Malo i le faatupula’ia o le tamāoaiga gafataulimaina, ma siitia ai le soifuaga lelei o tagata i nuu i tua ma faasafua ai manuia mo tagata uma.
O le asosi o faato’aga a Samoa o loo taulamua i le faamaopoopoina o atina’e o pisinisi laiti tau faato’aga.
O le a faatino foi i le motu o Savaii le tufatufaina o fesoasoani e ala i meafaigaluega mo le au faimaketi tu auala.
