Ua leva ona faatalitali le lalolagi atoa i le taeao o le Aso Sa poo ai o le All Blacks ma South Africa e siia le Ipu o le siamupini o le Ipu o le Lalolagi i le tausaga 2023. 

Ua tele matematega i luga o upega tafailagi ma faapea mai, e ono lelea mai le All Blacks ma le ipu ae o isi foi na lilifa o latou lagona e toe pepese Aferika ma le ipu i le tausaga lenei. 

O finauga ma matematega a le autapuai ua fua agai i le tutusa o tausaga sa siamupini ai ‘au nei e lua talu ona faagasolo mai le Ipu o le Lalolagi. 

O le tausaga e 1987, 2011 ma le 2015 na siamupini ai Niu Sila i le Ipu o le Lalolagi ae o Aferika o le tausaga 1995, 2007 ma le 2019 ma le tausaga lenei sa faatalitali ai loa poo ai o laua e muamua ona maua le fā tausaga o le siamupini. 

O lea ua toe kisikisi le alii kapeteni ia Siya Kolisi o Aferika i le ipu ina ua mae’a le taaloga o 12 South Africa i le 11 a le All Blacks. 

E ui i le faia’ina ma le fetagisi o le ‘au a Niu Sila ina ua lē manuia le sailiga siamupini sa iai le Ipu a le Lalolagi, ae sa maimoa ma silasila le lalolagi atoa i le maualuga ma le mati’e sa iai le taaalo a alo o Samoa o loo auai i le ‘au a Niu Sila. 

O le susuga ia Ardie Savea sa ia faaauauina le kapeteniina o le ‘au ina ua tuli i tua le kapeteni ia Sam Cane, ma sa mataina lona faafoefoeina mai o le laina i luma, o le alii o Rieko Ioane ma Mark Telea sa iloga foi lo laua finau i le laina i tua auā lava se ‘ai mo le All Blacks. 

Peitai e lei talia i ni vai e Aferika le ma’ema’eā o nei alo o le atunuu seia oo lava ina ili le faili a le laufali ma faamae’a le taaloga. 

Ua mae’a le Ipu o le Lalolagi o le 2023 ma ua toe pepese Aferika ma le ipu ma ua sosoo ai tausaga talu ona siamupini.