Ua ave le lagolago ma le faatāua a le faalapotopotoga o tusitala ma le au faasalalau a Samoa le J.A.W.S i le faatumau pea o le saolotoga e faatino ai lea auaunaga ma tautua, ma ave ai lana tuualalo i le taitai o le malo le afioga i le Palemia e toe silasila i le faaiuga ua tapu ai mo se taimi lē tumau tusitala o le nusipepa o le Samoa Observer mai le toe auai i fono tai vaiaso ma le Palemia.
O se faaiuga ua tapu ai ma avanoa e toe fesootai ai tusitala o lea auauanaga faasalalau i ,Minisita o le Kapeneta. O le tuualalo a le faalapotopotoga emn pei ona faailoa faalautele i se pepa o faamatalaga ia faamuta le tapu.
Ua faailoa ai e le JAWS i lea faasalalauga sa tatau i le palemia ona uia aiaiga ua faataoto i le tulafono o galuega faatusitala ma faasalalau a Samoa o le tausaga e 2015 i le tuuina muamua lea o se faasea tusitusia i le nusipepa ma soalaupule ai ni mataupu ua fesiligia ai le faatinoga o le galuega faatusitala ma ‘au faasalalau.
O se taunuuga e taunuu iai ia soalaupulega ae lē faamalieina ai lē ua faaseā, e avanoa loa ona tuuina atu le faaseā i le komiti faatonu o galuega faatusitala ma faasalalau mo le suesueina ma faia iai se faaiuga. E faatino lea laasaga pe afai e finagalo iai lē e ana le faaseā.
Ua ave le faamanatu a le faalapotopotoga i ona sui resitala ma e e le’o resitala ina ia mulimulita’ia le ta’iala o loo faatonutonu ai le galuega, ma ia faaaloalogia le tulaga paganoa o se tagata poo le privacy. Ua ave foi iai ma le faamanatu iai latou uma o galulue i le galuega ia vave faia se faatoesega pe a faamaonia se sese i se tusitusiga ma se lipoti aemaise i se tulaga tau i le faia o se tusitusiga ma se faasalalauga ua tau faaleaga.
I lenei lava mataupu ua faalauaitele ai foi se finagalo o le taitai o le vaega faaupufai o le Samoa ua Potopoto sa avea ma palemia le afioga Fiame Naomi Mataafa, ma ia faailoa sona fingalo ilitata i le faaiuga ua faia ai le tapu i tusitala o le nusipepa.
Faaalia e le Saofaapito o se taumafaiga e manino mai ai se gaioiga a le malo e saisai ma noanoa mau le fesiligia o pulegamalo ma ua tifatō ai i lalo ma pulega faatemokarasi i Samoa.
Faaalia foi e le afioga Fiame Naomi Mataafa o le faia o lea tapu ua soso’a ai le fatu o pulega lelei, i le mautali o le malo i le atunuu e ala i le saolotoga o tusitala e fesiligia ai i mataupu e taua ma anoa o loo fia silafia e tagata lautele.
