O le aveesea faamalosi mai o tagata Aukilani mai fale ona o lologa, ua iai nei ma le fesili pe a faapefea la peimeni o fale nofo totogi poo fale rent.

Ua maua e tala fou o le toatele o tagata o loo totogi rent e oo mai lava ananafi e moni ua maui atu le vai, ae o loo susū ma e le o saogalemu mo se nofo.

O nisi o fale o lea ua pipii ai le sticker lanu mumu poo le lanu samasama foi e fua i le ogaoga o mea ua faaleagaina.

Ua fesoasoani mai ai se tasi o tagata suesue mai le Iunivesite o Otago ma toe faapupula le tulafono o loo aiaia ai fale nofo totogi, le Residential Tenancies Act lea o loo ta’ua ai afai ua faaleagaina le nofoaga o loo e nofo totogi ai, e tatau ona pa’ū le tau e totogi agai i lē e ana le fale.

Ae mo fale ua matuai le mafai ona toe nofo ai se isi, e le tatau ona toe totogia se rent.

O se faamalamalamaga foi o loo saunoa ai Dr Lucy Barnard i tala a le 1News, o se mataupu o le a faamoemoe tasi i luga o feutanaiga i le va o le tagata totogi rent ma lē e ana le fale.

Afai ae iai se feteenaiga o loo fautuaina lou sulu agai i le Tenancy Tribunal.