Pe ā ma le $613 tupe faaopoopo e totogi e aiga Aukilani mo rates faapea ai ma pili o le suavai i lenei tausaga ona o le taugata o le soifuaga o loo iai nei.
Fuafuaga mamao lea a le pulenuu ia Wayne Brown, poo lana paketi 10 tausaga, ma o lea ua mae’a ioeina e le toatele o councillors ananafi a o lei alu i tua mo le faatalanoaina o finagalo o tagata lautele.
E 4 vaiaso lea ua tuu mai e faaali ai finagalo o aiga Aukilani e tusa ma le fuafuaga o loo sau ai ma tupe totogi faaopoopo ua ta’ua.
Na ta’ua e le Pulenuu, e lē na o Aukilani le Council ua sii rates i lenei tausaga, e faapea foi isi puleganuu.
Ae i le fesiligia ai la o le minisita o Aukilani, Simeon Brown e tusa ma le siitaga o pili o le suavai faapea rates a Aukilani, na ia ta’ua o loo galulue nei le malo ma le pulenuu o Aukilani e faatalanoa pili o le vai, ae mo rates, na tali manino le minisita o le itu lea e patino lava i le Council, pau lana fautuaga i le Council o le ave o le faamuamua i mea e tatau ona iai, ae lē o le manao tele.
O fuafuaga uma nei e amata tatala i tagata Aukilani mai le Aso Lulu o le vaiaso fou mo le faaalia o finagalo o tagata, seia faagata i le aso 28 o le masina o Mati.
