Afai e iai sau fagafao, o lona uiga o le isi lea tupe faaopoopo o le a tuu i luga o le bond o le fale mautotogi.
O suiga nei ua faailoa mai e le malo e lē o toe mamao mafai ona faatalosagaina e tagata e onaina fale mautotogi poo landlords le bond faaopoopo mo i latou e iai fagafao.
O lea e oo atu i le 4 vaiaso le tau o rent o loo tauaofai i totonu o le bond, ma afai ae aloaia le suiga ua faailoa mai o lona uiga o le a faaopoopo iai ma le isi oo atu i le 2 vaiaso o le rent e totogi ona o le fagafao.
O teuteuga nei o loo sau i lalo o le Residential Tenancies Act lea na faailoa mai i le vaiaso ua te’a, ma o le masina a sau e folasia ai i luma o le Palemene mo le talanoaina.
I se saunoaga a le minisita o fale Chris Bishop, e lē faigofie le sailiga o se fale e o iai tagata e iai fagafao, ma o le totogi o le bond faaopoopo mo le fagafao o se tasi o auala o le a faafaigofie ai.
O loo talileleia e le Pet Refuge le suiga ua faailoa mai ona o le faigata ona talia e le tele o fale mautotogi o aiga o loo tau saili ni fale ona o fagafao ma oo ai atu ai ina faaumiumi ona toe vaaia e pulega e iai le Pet Refuge fagafao a aiga seia oo ina maua se fale.
Puna o Faamatalaga: Landlords will be able to charge ‘pet bond’ — Govt (1news.co.nz)
