Ua talia le talosaga a sui faasalalau o le polokalame o le Maota o Viiga i Sini Ausetalia e tuua ai taualumaga a le faamasinoga a Samoa, ae malaga i Ausetalia e pei ona sa finauina e le la loia o Faimalomatumua Mathew Lemisio lea talosaga.
O le Aso Lulu o lenei vaiaso na aumai ai lea faai’uga a le Faamasinoga Faaitumalo i le māfua’aga, e leai se lamatiaga o le tuua o Samoa e Toleafoa Sa’ia Toleafoa ma Ainuu Iliganoa Savaiinaea, e pei ona sa finau le loia a leoleo afai e talia le talosaga e lē toe foi mai i Samoa i lo la faamasinoga.
O mau sa tuuina atu e le loia a sui faasalalau ua ioe le faamasinoga i lana faai’uga o Toleafoa ma Ainuu o ni tagata e talitonuina e toe foi mai e tali o la moliaga.
O Ianuari o le tausaga fou e toe malaga mai ai i se matāupu tau faamasinoga o fanua ma suafa, e pei foi ona sa malaga mai ai i le masina o Novema ae taofia ai e leoleo i moliaga o le faia o faasalalauga taufaaleaga i le la polokalame.
O le matala ia sega o le finagalo o le faamasinoga ma tuu avanoa i ia sui faasalalau e tuua le atunuu ae malaga i Ausetalia o loo faamautū ai mo nisi o fuafuaga tāua, ua faia ai ma le aiaiga e faamautinoa ai lo la foi mai e faaauau ona su’esu’e o la moliaga.
O lea aiaiga o le totogi o le ta’i lima afe tālā a le tagata ma le isi ta’i sefulu afe a le tagata i le aofa’iga tuufaatasi e 30 afe tālā.
E faato’ā mafai ona malaga ese ma le atunuu pe a mae’a ona totogi muamua lea aofa’iga o tupe lea e ta’ua o le surety.
O le masina o Iulai o le tausaga fou 2026 ua faatulaga e valaau ai molimau a leoleo ae o loo teena uma moliaga a leoleo e sui faasalalau.
O se tasi o aiaiga tāua o le faai’uga a le faamasinoga o le tapu pe faasā ona toe faia le polokalame o le maota o viiga i soo se auala o fesoota’iga se’ia oo ina su’esu’eina moliaga ma aumai se faai’uga a le faamasinoga.
Sa maua se finagalo o le afioga Toleafoa Sa’ia ina ua mae’a ona lau le faai’uga.
Le tasi o sui faasalalau o le maota o viiga le afioga Toleafoa Sa’ia Toleafoa.
