Na viiviia le loto tetele o leoleo a Hamilton na vave ane ma laveai tagata sa i totonu o le taavale ua lavea ma ua amata ona mu.
O le faalavelave tau taavale lenei na tulai mai i le vaveao ananafi e latalata i le itula e 4 ina ua feto’ai se tasi o taavale ma le loli kiliva a le Fonterra i Ulster Street i Hamilton.
O se faalavelave tau taavale ua tuuaia ai le saoasaoa tele o le taavale laititi na mu, ma e toalua na maliliu ai lava i le nofoaga na tupu ai a o le isi toalua o loo taofia tigaina i le falemai.
E toafa lea na mafai ona toso ese e leoleo mai le taavale ua mu.
I molimau a tagata nonofo lata ane i le nofoaga na tupu ai, e na o nai sekone na tupu ai ae taunuu atu loa ma le taavale a leoleo.
Na faamaonia mai ai foi e le ofisa, e lei faapea a mea na tuliloa e le taavale a leoleo le taavale laititi ua mu.
Ae i le aveloli, o lea ua faamaonia mai e le Fonterra Brands e tauala mai i le Newshub e lei iai ni manu’aga o le aveloli.
