E foliga e lē o iai ni mea o faaleagaina ma ua toe sologa malie foi pisinisi ma le soifuaga e masani ai i le malo o Tonga i le asō i le mae’a o le faalogoina o se mafui’e e 7 lona malosi i le fua mafui’e, lūlū i le te’a o le 1 i le vaveao analeila ma sa ogatotonu tonu i le tusa ma le 79 kilomita mai le itu i Saute i Sasae o Pangai i le motu o Haapai.

Fai mai sa iai faailo ma lapata’iga mo galulolo ma fautuaina ai tagata e aga’i i nofoaga maualuluga peita’i na toe faalēaogāina lea lapata’iga a o le’i tāina le 5 i le vaveao analeila.

O molimau a nisi o tagata Niu Sila o loo aumau ai i Tonga, e foliga e lē o iai ni mea o faaleagaina i le mafui’e ae na faalogoina lava le taimi na lūlū ai.

E iai lipoti ua ta’ua ai na faalogoina foi le lūlū o le mafui’e lea i le motu o Niue ae foliga e leai foi ni aafiaga o iai.

Puna o Faamatalaga: https://www.rnz.co.nz/international/pacific-news/556701/tonga-quake-it-was-a-little-bit-scary-but-life-returns-to-normal