E le tuutalaloaina le taimi galue o tofiga o sui o le Malo o Samoa i atunuu i fafo.

O le faamaninoga lea e le afioga i le Palemia o taimi galulue o Komesina maualuga (High Commissioner) ma Konesula (Consul General) o le Malo o Samoa i atunuu i fafo.

Na fesiligia le taitai o le Malo i lea tulaga ina ua ia faalauiloa le faaiuga a le Kapeneta ua faamaonia ai ni tamalii ua filifilia e tauaveina le tulaga Komesina Sili o Samoa i Niu Sila ma le Konesula Aoao i Aukilani Niu Sila.

O le afioga Afamasaga Faamatala Toleafoa ua avea ma Komesina Maualuga poo le High Commissioner, ua sui tulaga i le afioga Leasi Papalii Tommy Scanlan na faamuta lona taimi galue i lea tofiga ia Setema o le tausaga na tea nei.

O le afioga Afemata Palusalue Faapo II o le Konesula Aoao lea ua filifilia mo le aai tele o Aukilani i Niu Sila ma ua sui tulaga i le afioga Faolotoi Reupena Pogi ua faamuta foi lona taimi galue ae ua silia i le sefulu tausaga o ia tauaveina lea tofiga o le Malo o Samoa.

O Afamasaga Faamatala Toleafoa e le fou i lea auaunaga auā sa avea ma Konesula Aoao o Samoa i Aukilani i ni tausaga ua tuanai, ae sa avea foi ma Konesula o Samoa i atunuu Europa ma sa faamautu i Peleseuma i ni tausaga foi ua mavae, sa avea foi ma sui faipule o le Palemene. 

O le afioga Afemata Palusalue Faapo II sa avea ma sui faipule o Safata ma sa taitai i le vaega faaupufai o le Tautua Samoa lea sa avea ai ma taitai o le Itu agai i le paeaiga o le tausaga e 2011 i le 2016.

O se tasi o filifiliga a le kapeneta ua faamaonia o le toe tofia lea o se tasi o tamalii le afioga Vaatu’itu’i Apete Meredith e avea ma Komesina o Fefaatauaiga i Niu Sila, o se tofiga sa ia tauaveina muamua i ni tausaga ua mavae.

O lea ua toe see atu e tauave lea tofiga tāua auā le faaleleia o maketi mo oloa e auina mai Samoa e auina atu i Niu Sila.

O le afioga Magele Mauiliu Magele sa avea ma faipule o le Palemene sa ia tauave lea tofiga i ni tausaga ua mavae ae peitai ua mae’a lana auaunaga.