Ua maualuga le taumafaiga a le sui tamaitai o le au siisii u’amea mamafa a Samoa ia Feagaiga Stowers ina ua ia faatū ni matāti’a se tolu o le Oceania ma manumalo ai le faailoga o le Best Overall Female i le ipu a le Oceania Online Cup 2022 lea sa faia i le faaiuga o le vaiaso.
Na ripotia mai e le Samoa Observer e 121kg le mamafa na sii e Feagaiga Stowers i le si’i malele poo le snatch ma le 155kg le mamafa o le sii mālōlō ma maua ai le tuufaatasiga e 276kg le mamafa. I lea tuufaatasiga atoa na faamaonia ai le faatū ai e lea tamaitai o ni matāti’a fou e tolu i le itulagi.
I le masina o Iulai o le a sauni Feagaiga e puipui lona manumalo ai i le vaega o tamaitai silia ma le 90kg le mamafa i le tausaga e 2018 lea na pine auro ai i taaloga malo taupulega i Gold Coast i Ausetalia, Commonwealth Games a’o sauni atu ai le au a le atunuu mo ia taaloga faitaulia.
Na ave ai foi le faamalo a le Faiaoga o le au siisii uamea mamafa Tuaopepe Jerry Wallwork i taumafaiga a Feagaiga ma na taua e Tuaopepe ua matuā telē le agai i luma o naunau ma le malosi o lea tamaitai Samoa i le taaloga ma o se vaega taua tele lea.
