O le masina ua mavae na faalauiloa ai sui fou o le laulau a le asosi Triathlon i Samoa lea na tofia mai i le aso sa faatino ai le fonotaga faaletausaga a le asosi.
Ae peitai, o le aso ananafi lea na faailoa ai i se faamatalaga mai le laulau fou le tusi na tuuina atu mai le Peresitene o le Komiti o Taaloga a Samoa, Pauga Talalelei Pauga o loo folasia ai nisi o mataupu e ao ona toe silasila iai le asosi.
O le iugafono i le masina ua mavae lea na filiffilia ai Arthur Mulitalo e avea ma Peresitene lea sa tulai mai ai Seti Afoa i lea tofiga mo le 9 tausaga.
O vaega o loo tusia i lenei tusi e aofia ai le lua o laulau a le asosi, e tasi lava le lesitala o le asosi i le Matagaluega o Pisinisi Alamanuia ma e tatau ona tasi lava le laulau poo le komiti, o le mataupu i faiga faavae a le asosi ma lona iloiloga e le o manino i isi sui o le asosi ma le popolega i mataupu tau tupe mai le 3 tausaga talu ai a le asosi ma nisi o mataupu.
O nei mataupu uma o loo tusia i le tusi a le Peresitene ua faaalia ai loa se manatu o le komiti ina ia toe silasila iai le asosi e aofia ai ma le lē taliaina e le komiti o sui o le laulau fou a le asosi lea na filifilia i lana fonotaga i le masina ua mavae.
Ua tuuina ai nei le tolu masina i le asosi ina ia faia se fofo o nei mataupu ae afai o le a lē utagia lenei vaega o loo iai le pule i le komiti e faamalolo lē tumau ai le asosi o se sui o le faamalu o taaloga a Samoa ma tuuina ai loa sui taaalo o lenei faagatama i lalo o le komiti o taaloga a Samoa.
O loo ta’ua ai foi i lenei tusi o loo maua pea le avanoa o sui taaalo o lenei faagatama e tauva ai i taaloga o le Pasefika ia Novema.
I se faamatalaga mai sui o le laulau a le asosi o loo ta’ua ai le faanoanoaga i le komiti i lo latou lē amanaia ai o iuga o le fonotaga a le asosi.
“O se faanoanoaga tele lea i mātua ma aiga o le ‘au triathlon a Samoa sa faapea ona gapatia ai i tausaga e 3 ua mavae e tusa ai o le fuafuaga a le komiti o taaloga a Samoa.
“Sa o matou taumafai e faailo lenei mataupu o le lē auai ai o le Peresitene ma lana laulau sa iai muamua lea sa o matou uia lava le faavae o lenei asosi ma faatino ai loa le fonotaga lea sa ioeina e le SASNOC lea na auai lava ona sui e molimauina lenei fonotaga.
“O le iuga o le palota lea na fili ai se laulau fou ma o i latou ua tulai mai i le tofiga o i latou o sui taaalo ma mātua.
“O le lē taliaina ai o iugafono a lenei asosi e le komiti o loo atagia ai le lē taliaina e le komiti o leo a sui taaalo o le asosi.
“Ua mae’a ona faia uma mea o loo tusia mai i le tusi o se tulaga faanoanoa tele ae ui i lea e le o avea lea ma auala e faavaivai la matou taumafai i lenei taaloga aemaise lava i faiaoga ma i latou o loo tapena mo taaloga o loo loma nei.”
O le vaiaso na tea nei lea sa tuuina ai le lisi o le ‘au a le triathlon Samoa mo taaloga a le Pasefika ae na ta’ua i lenei faasilasilaga o le a lē auai le ‘au pe a faapea o le a taitaiina e nisi, o loo tele nisi o taaloga o loo matou tapena atu iai ma e lagona ai le loto faafetai i nei avanoa.”
