O se fesoasoani tele i aiga le tala ua faailoa mai o le maua o le eletise e aunoa ma se totogi mo le tolu masina.
O le meaalofa lenei a le kamupani a le Contact Energy i le itu tau i le eletise ua faaigoaina o le Fourth Trimester ma e maua fua ai le eletise mo aiga Kiwi o loo faamoemoe e maua le pepe fou mai le vaiaso fou.
O le uluai aso o Fepuari tusa lea o le Aso Lulu o le vaiaso a sau e amata faitau mai ai le piriota aloaia o lenei faigameaalofa, ma e oo atu i le 2 miliona itula maua fua o le eletise.
Mai le Contact ua maitauina le siitaga e oo atu i le 91% o le eletise faaaoga e aiga e maua pepe fou, ma o lenei fesoasoani e le taumate o le a faamāmā avega i le taugata o le tausiga o le pepe fou ae faapea isi tau o loo totogi e matua.
E molimau le Whanau Awhina Plunket o se matuai fesoasoani tele lea i matua.
O le tausiga o le pepe fou i totonu o Niu Sila e tusa ma suesuega e lē i lalo mai o le $9,100 i totonu o le tausaga.
Ae mai nisi o paaga ua leva ma o loo iai pea a le Contact Energy, maimau e pe ana faasafua lea fesoasoani i le toatele o paaga ona e le na o matua o maua pepe fou o mafatia i le taugata tele o le tau o le soifuaga ua iai nei.
