Ua lipotia nei, le oo atu i le 3 faalavelave ua tula’i mai i totonu o le 48 itula i le va o ni kegi i le faaitu i Hawkes Bay, ma ua ta’ua le faateteleina o feeseesea’iga o kegi ona o nei faalavelave.
Ua māua i lipoti o nei faalavelave o loo aofia ai ni laau malosi, i le va o kegi o le Black Power ma le Mongrel Mob.
Ma i le alia’e ai o lenei mataupu i Hawkes Bay, ua faailoa ai le oo atu i le 28 tusi faataga poo warrants a leoleo na faasolo e amata mai lava i le aso 24 o Aperila ona o feeseesea’iga a kegi nei, ma ua faamauina ai i lipoti le oo atu i le 8 tagata ua saisai ma taofia e leoleo.
Na faaalia e le alii Minisita o Leoleo, Mark Mitchell lo latou galulue faatasi ma le matāgaluega ina ia foia lenei faafitauli, ae ta’ua e Mitchell le faalavelaveina o tusi faataga i taimi faapenei ona o le tulaga ma’ale’ale o loo iai.
Ae e ui i lea o loo galulue malosi le malo ina ia taofia le tula’i mai pea o nei faalavelave i le va o kegi, i le fetaua’i ma le faaoo manu’a.
O le naunauta’iga ina ia saogalemu pea tagata lautele.
I nisi o lipoti mai le leitio faavaomalo na faamanino ai gaioiga ma moliaga o le to’avalu ua taofioa nei e leoleo.
O le to’alua o alii 18 tausaga ma le 35 tausaga le matutua, o loo molia i le talepe fale matuiā, o le umiaina o se a’upega malosi, e fesoota’i i se faalavelave na tula’i mai i le afiafi o le Aso Lua, i le tafana ai o se fale i Wairoa.
O le tasi o alii e 21 tausaga le matua na saisai ma ua taofia e leoleo, ma ua molia i moliaga e fesoota’i i fuālaau faasāina ma moliaga e fesoota’i i le faafoeina o se taavale.
E 21 tausaga o se tamaitai, ua molia i le amio lē pulea i nofoaga faitele ma se alii 50 tausaga le matua ua molia i lona solia o aiaiga o le tatala ai o ia i tua.
O le isi to’alua, o le alii e 37 tausaga le matua, na taofia ma molia i le faaalia o uiga ma gaioiga e fesoota’i i kegi e tapu ona faia pe faaalia, ma se alii Wairoa e 42 tausaga le matua, ua molia i lona umia o laau faasāina o le mariuana.
Ma i le Aso Sa na ta’ua ai e leoleo lo latou taofia ai o se alii e 44 tausaga le matua, ua molia i lona umia lea o le pauta faasāina o le methamphetamine ma lona umia o se a’upega.
Puna o Faamatalaga: https://www.newstalkzb.co.nz/on-air/mike-hosking-breakfast/audio/mark-mitchell-police-minister-on-the-gang-conflict-warrants-in-hawkes-bay/
