O le taeao nei ua faaleagaina ai se vaega o Paraparaumu i Kapiti Coast i le asiosio.

Pe tusa o le ‘afa o le lima i le vaveao analeila e tusa ma ripoti mai leoleo lea na faaleagaina ai taualuga o fale faapea laau toulu.

Mai le ofisa o tineimu o lea na tali atu i valaau uma na faaoo ane mai e tusa ma fale ua faaleagaina i Aorangi Road ma e tuufaatasia tala fou o lea ua iai sui o le ofisa i le tele o vaega o Paraparaumu ua faaleagaina.

O le asiosio i le taeao nei ua tolu iai aso sosoo o osofai Tasman ma Aukilani i asiosio, e pei ona amata ai i Sasae o Aukilani i le po o le Aso Sa.

I faamaoniga e oo mai i le taimi e tuufaatasia ai tala fou o le taeao, o Sasae o Aukilani o lea ua pipii ai le 10 stickers lanu samasama i fale na faaleagaina, mai le tusa ma le 60 i le 70 fale ua mae’a asiasi.

O le asiosio lona lua ananafi o le itumalo o Tasman latalata i Nelson lea e faapea e tusa ma le 50 fale ua faaleagaina ai.

E le gata la o meatotino ua faaleagaina ae o lea ua tele ina motusia ai ma le eletise ona o pou moli na faaleagaina, faapea ai ma le tapunia o nisi o auala ona o laau toulu.

O le tele o fale ua faaleagaina e asiosio uma nei e tolu o taualuga o fale ua ave, ma e faafetaia e leai se soifua ma’umau poo se isi foi na faamanualia ai.