O le umia o nakoti ma le fa’aulufale i Samoa i se gaioiga solitulafono, o se fagu tā’ele le shampoo na fafao ai i totonu pepa lāiti e fitu o loo iai ni vaega o le la’au faasāina o le maruana; o moliaga ia a leoleo o loo molia ai le ali’i o Michael Gibson, o se tagatanu’u o Niu Sila lea na tula’i i le Fa’amasinoga Maualuga i le Aso Gafua o lenei vaiaso.

E le’i tu’uina atu sana tali ona e le’i mae’a ona fa’amautū tapenaga a leoleo i moliaga faai’u, ma ua toe tolo atu ai i le Aso Gafua asau e tatau ona mautū uma ai moliaga. O loo talosaga foi le loia a Michael Gibson, i se fetuuna’iga o aiaiga o loo tatala ai i tua ona o loo fia malaga i Niu Sila. O le Aso Gafua foi 26 o Oketopa e tatau ona tu’uina atu ai se tali a leoleo pe latou te lagolagoina pe tē’ena lea talosaga.

O lea tagatanu’u o Niu Sila na su’esu’e e leoleo ina ua maua i le galuega masani a le Ofisa o Tiute i le falemeli i le aso 29 o Setema, se afīfī o se fa’amomoli o loo fafao mai ai le fagu shampoo ae o loo iai i totonu ma taga pepa lāiti o loo iai maruana.