O motu o Antigua ma Barbuda i le atu Kerepeane o le a usuia ai le fono o soso’o ai nei a Ta’ita’i o Malo o le Taupulega a Peretania tele, o le a avea ai le afioga i le tama’ita’i Sui Palemia o Samoa ma ta’ita’i o le usugafono a lo tatou malo ma le atunu’u le afioga Mulipola Anarosa Ale Molio’o.

O lea fono a Malo o le Taupulega o le a fa’aauau ai le tulaga ta’ita’ifono o Samoa talu mai le Fono a Ta’ita’i o Malo o le Taupulega sa talimalo ai lo tatou atunu’u ia Oketopa o le tausaga e 2024.

O le a fa’aauau ai i le fono i Antigua ma Barbuda ona talanoa nisi o mataupu lautetele sa talanoaina i Samoa aemaise lava i vaega tau pisinsi, sosaiete ma fa’alapotopotoga, o tupulaga talavou fa’apea ai foi ona iloilo mataupu tāua e ave iai le fa’amuamua mo le manuia o atunuu o loo ile lio o malo o le taupulega. O Novema mai le aso muamua i le aso 4 e fa’agasolo ai lea fono fa’avaomalo.