A o agai le malo e faafetaia’i le taugata o le soifuaga, ua tolopo pe le faataunuuina ai ma nisi o poloketi.
O le faasilasilaga mai le Palemia Chris Hipkins ananafi o loo ta’ua ai le bread and butter package ua sau ai ma le tala o le tele o isi galuega na fuafua o le a le mafai ona faataunuuina ona o lea ua ave le faamuamua e fesoasoani ai i tagata ona o le taugata o le soifuaga.
Saunoa le Palemia e le o faigofie i le malo le tolopo poo le taofia o nisi o galuega na fuafua, peitai ua toe fetuunai e le malo lana faamuamua e ave i le toe faaleleia o mea na faaleagaina e le afā faapea ai ma le taugata o le tau o le soifuaga.
O le tele o poloketi ma galuega na fuafua o lea ua toe tuu pe tolopo foi, o le vaega o felauaiga.
O le Clean Car Upgrade lea foi ua leai sa iai le $568 miliona poo tupe nei e tuuina atu i tagata e agavaa e unaia ai le faatau o taavale e itiiti le faaleagaina o le siosiomaga mai kasa oona.
O lea foi ua toe tuu atu i tua le container return scheme lea e totogi ai le 20 sene pe a faafoi le atigifagu.
Ua tuuese ai foi e le malo ma le polokalame na faatulaga e faatulafonoina ai le 16 tausaga mo le faigapalota.
O nei toe faatulagana ua teena ai foi e le Palemia ma faamatalaga na faalele e faapea ua leai se faamuamua a le malo o ave i suiga o le tau.
