Ua talosaga leoleo i le faamasinoga ina ia tolopo atu le mataupu a Fauena Sam Su’a ma lona toalua o Sivai Kepi faapea le mataupu a le tamaitai o Lise Schmidt ina ia tolaulau faatasi ma le mataupu a Fepuleai Faimata Su’a i le Aso Lua o le vaiaso fou, aso 27 o Fepuari, 2024.
Ua faamanino foi e le loia o loo tulai mo leoleo ia Leinafo Taimalelagi Strickland o lea foi aso o le a faamautū ai moliaga a leoleo ma tuuina atu i le faamasinoga, faapea ai ma le auai uma o loia a itu faamasinoga ma o masalosaloga o le itu a leoleo e ono teena e i latou moliaga.
Ua faailoa e le tamaitai loia o se itu lelei lea o le a mafai ai ona faatulaga se aso e suesue ai mau o le mataupu, ma tilotilo ai le faamasinoga i le mataupu e faatatau le tatala ai i tua o Sam pe faatulaga foi se aso vave mo le suesueina o le mataupu pe tuua atu foi i se aso mulimuli mai.
Ua faailoa foi e Leinafo ua mae’a faila atu e leoleo i le faamasinoga moliaga mo i latou ua tulai i le asō ma lē o le a tulai i le Aso Lua o le vaiaso fou.
Ua faaalia foi e le tamaitai loia o le a faamautū ai foi i lea aso moliaga a leoleo ma tuuina atu le faasologa o moliaga.
Na ta’ua foi o moliaga o loo i luma o le faamasinoga o nisi o moliaga e le talafeagai (substitute charges) ae o isi o moliaga faaopoopo (additional charges).
Ua faamoemoe foi le tamaitai loia e oo atu i lea aso ua mautu mai information numbers o moliaga e pei ona faatulaga ai e le Faamasinoga.
E lē o teena e le loia a Sam ma Sivai le talosaga a leoleo i le faamasinoga, ae o loo manatu le alii loia o le a faailoa atu e le itu a leoleo pe o molia faatasi Fepuleai ma i latou na tulai nei i moliaga ia pe ese mai.
Saunoa le tamaitai Faamasino ia Talasa Saaga e manatu le faamasinoga e talafeagai le talosaga a le itu a leoleo ona e 167 moliaga o loo i ona luma e faasaga ia Sam Fauena Su’a ae pe ā ma le 34 moliaga faasaga ia Sivai ma o ia moliaga e lei faanumeraina, aemaise ai o loo faaletonu la latou system.
E lē o manatu le tamaita’i Faamasino e tatau ona tilotilo i le tatala ai i tua o Sam i le taimi nei seia mautu moliaga i le valaauga i le vaiaso fou aemaise ai foi o loo iai le isi mataupu o loo tuai ai ona e lei faitauina e le Faamasinoga le faaiuga o le CT Scan poo le fā’ata o Sam lea na faia i le Aso Tofi o le vaiaso ua mavae.
Ona e tāua lea tulaga o se tasi o mafuaaga o loo i totonu o le talosaga na tuuina atu e tatala ai Sam i tua o lona soifua maloloina.
Na ta’ua e Fetu Lagaaia le alii loia a Sam, ua mae’a ona faia lea tulaga ae o le a faaoo mai i se taimi vave i le Faamasinoga.
O loo tumau pea le taofia o Sam ma Sivai i tuutuuga o loo iai e faanofoesea mai isi pagota, ia vaavaaia Sam tai itula ma siaki, ia mautinoa e tatala le avanoa e talanoa ai i laua i la loia.
O le a toe valaau lenei mataupu i le Aso Lua o le vaiaso fou.
