Ua talia ai e le afioga i le Ao Mamalu o le Malo le fautuaga a le komisi o galuega a le faamasinoga e faauluulu i le afioga i le Faamasino Sili, e tofia le tama’ita’i loia sinia afioga Sili Elizabeth Chan Tung Peters e avea ma se tasi o Faamasino o le Faamasinoga Faaitumalo a le atunuu.
O lea tofiga ua faaalia e le Ofisa Sili o le pulega o le matāgaluega o faamasinoga ma le faafoeina o faamasinoga le susuga Papalii John Taimalelagi Afelē, o le a faatauto ai le tama’ita’i faamasino ua tofia i se sauniga ua faatulaga mo le Aso Lua o le vaiaso fou.
O le afioga Sili Elizabeth Chan Tung Tuautu Ross Peters o loo galue i se ofisa loia tuma’oti i lo tatou atunuu.
O lona valaauina e tautua i le tofi faamasino o le Faamasinoga Faaitumalo a Samoa ua to’alima ai ia te ia tama’ita’i loia sinia o le atunuu ua avea ma faamasino o lea faamasinoga.
O le taimi nei e to’alua tama’ita’i faamasino o loo galulue i lea faamasinoga a le atunuu.
O le afioga lea ia Talasa Atoa Saaga ma le afioga Alalatoa Rosella Papalii.
