O le Aso Tofi, 7 Iulai 2022 na amata aloaia ai le afioga Fauoo Fatu Tielu i lona tofiga o le pule lē tumau o le kamupani vaalele a le Samoa Airways mo le taimi lenei (Interim Managing Director) a o faatalia ai fuafuaga uma e faamautu mo le kamupani vaalele a le atunuu. O le tofia ai o Fauoo ua ia suia ai lē sa avea ma Pule Sili o le Samoa Airways talu ai, Seiuli Alvin Tuala.
Na faamautu mai i se pepa o faamatalaga mai le afioga i le Minisita o Pisinisi, Alamanuia ma Leipa, Hon Leatinuu Wayne Sooialo, le tofiga ua iai nei le afioga Fauoo ina ua fesiligia e le sui o le Radio Samoa. Saunoa Leatinuu, o le tofiga o Fauoo na faia e le Kapeneta mai le fautuaga a le Komiti Faatonu Lē Tumau (Interim Board).
Saunoa foi Leatinuu, sa fai se latou feiloa’iga ma le Interim Management Board faapea le aufaigaluega, ma talanoaina ai faafitauli ma lu’itau o loo fesaga’ia ma le kamupani vaalele i le taimi nei.
Ae o le itu sili ona tāua, sa ioeina e tagata uma, e ui lava i lu’itau ua feagai ma le kamupani i lenei taimi talu mai tapu o le Koviti-19 aemaise foi faai’uga a le pulega talu ai, ae tatau i le kamupani ona saili avanoa uma ma faamautu ni faigapaaga ma isi kamupani vaalele ina ia faaauau ai pea auaunaga tau vaalele mo tatou tagata aemaise foi mo le tulaga tau pisinisi a le kamupani.
O loo aofia ai foi le afioga Fauoo i le Komiti Faafoe Lē Tumau lea na tofia e le Kapeneta e faafoeina galuega a le kamupani mo lenei taimi (Interim Board), lea e ta’ita’ifono ai Tupuola Koki Tuala, faatasi ai ma isi sui auai e to’alua e aofia ai alii faipisinisi o Fauolo Fatu Tielu ma Taimalie Charlie Ah Liki.
O le masina talu ai lea na faia ai le faai’uga a le Kapeneta ma faamuta ai le komiti faafoe sa iai talu ai a le kamupani vaalele, na ta’ita’ifono ai Muagututi’a Lafaele Ngau Chun, Papalii Sonya Hunter ma Tuia Paepae Letoa.
O le afioga Fauoo e lē fou i lenei faalapotopotoga o mea tau vaalele, e pei ona sa tofia ai foi e le faigamalo sa iai i lena vaitaimi le avea o Fauoo ma Pule Sili o le kamupani vaalele a le Polenisia mai le tausaga 2006 i le 2014.
