Ua saunoa le sui Komesina o Aiātatau i Niu Sila, Saunoamaalii Dr Karanina Sumeo i le lipoti a le Leitio faavaomalo a Niu Sila e faapea o nisi o mataupu o loo tulai mai i le RSE Scheme poo le Recognised Seasonal Employer scheme, galuega faavaitaimi e tatau ona tagofia muamua ae lei toe faalautele nisi fuafuaga i lea matafaioi.
Ua faia lea saunoaga a Saunoamaalii ae lei leva ona saunoa foi le Palemia o Niu Sila e manao i le faitau afe o tagata faigaluega faavaitaimi mai le Pasefika i Aotearoa.
Fai mai le sui komesina i lea lipoti e ui o le faalauteleina o ia avanoa lelei e toatele ai tagata faigaluega Pasefika o le a ave ane ai ae e lei vaai lava i suiga i le auaunaga lenei talu mai le suesuega sa faia a le malo i lea vaega sa maitauina ai le tele o popolega i le ituaiga treatment e faia i tagata faigaluega mai le Pasefika.
Saunoa le sui komesina i le faatalanoaga i le Pacific Morning, o le suesuega na iloa ai e faailogalanu faiga sa feagai ma nisi o le aufaigaluega faavaitaimi mai le Pasefika ma ia valaau ai loa mo se toe fetuunaiga vave i le RSE Scheme aemaise lava i mataupu tau totogi, ma nofoaga e nonofo ai.
Na ia saunoa foi e lelei ona tagofia muamua popolega ia ma faasao mea uma a o lei toe faaopoopo le aofai o o tatou tagata e malaga mai i ia avanoa faigaluega.
Puna o Faamatalaga: https://www.rnz.co.nz/international/pacific-news/519978/human-rights-chief-renews-call-for-changes-to-rse-scheme
