O le mataupu i le tagi a le FAST faasaga i le malelega a le Ao o le Malo i le toe faia ai o se faigapalota fou a Samoa lea na fuafua e valaau i le taeao analeila lea ua toe tuu atu i le Aso Faraile 14 o Me 2021.

O le taeao nei lea na tuu atu ai se talosaga a le Loia o loo tulai mo le vaega faaupufai a le FAST le susuga Taulapapa Brenda Heather Latu i luma o le faamasinoga maualuga pe mafai ai se poloaiga le tumau poo le Interim Declaration e taofia ai le Faigapalota fou lea e fuafua mo le Aso Faraile 21 o Me. Na talosaga foi Taulapapa e tuu atu i tua  le taimi e iloilo ai le mataupu e ala i le tagi a le FAST i le Aso Gafua o le vaiaso fou.

Peitai na tali le afioga i le Faamasino Sili, Satiu Simativa Perese o lenei mataupu ua i luma o le faamasinoga e fai sina taua tele ma e tatua lava ona maua vave se faaiuga ae lei oo Samoa i le isi faigapalota fou o loo fuafua mo le Aso 21 o Me.

O le aotelega atoa o lenei mataupu o le a maua mai i le Aso Faraile a sau nei , Aso 14 o Me i le itula e 9 i le taeao.

O le Aso Lulu 19 o Me lea e fuafua e fai ai palota muamua a le atunuu poo le pre-polling ma e tatau ona maua se iuga a le faamasinoga maualuga e lei oo i lea tulaga.