O le aso 7 o le masina fou o Aperila ua toe tolo iai le valaauga o le tagi o tuua’iga o le faia o tala taufaaleaga ua afaina ai le tulaga ta’uleleia o le Minisita o A’oga ma Aganuu, lea o loo molia ai le ta’ita’i o le vaega e puipuia aiā tatau a tagata le susuga Tuilaepa Lupesoliai Sailele Malielegaoi.
O le Aso Lua o lenei vaiaso na valaau ai mo le taimi muamua lea matāupu tau faamasinoga i le Faamasinoga Faaitumalo, peita’i e le’i mae’a ona faamautū moliaga a leoleo ma talia ai le talosaga e toe tolopo mo se lua vaiaso.
O se loia mai fafo o le a finauina moliaga a leoleo ae o se loia e galue tuto’atasi o loo finauina le itu a Tuilaepa.
E le’i auai lē o loo molia ona o se gasegase e pei ona sa tuuina atu e lana loia le pepama’i e faamaonia ai, ae peita’i o le isi valaauga o sosoo ai e tatau ona oo atu i le faamasinoga.
O le Aso Lua 7 o Aperila pe a mae’a le aso mālōlō o le Eseta i le Aso Gafua e toe valaau ai i luma o le tama’ita’i faamasino le afioga Alalatoa Rosela Papalii lenei matāupu.
