Ua toe tolopo le lauina o se faai’uga a le faamasinoga i moliaga o loo tuua’ia ai le Palemia ma isi tagata e to’alima e aofia ai Fepuleai Faimata Su’a, Li’o Faataumalama Auava, Samuelu Su’a, Sivai Kepi ma Lise Marie Schmidt.
O le Aso Faraile o le vaiaso nei 27 o Mati ua toe tuu atu iai le lauina o le faai’uga a le tama’ita’i faamasino sinia o le faamasinoga faaitumalo le afioga Talasa Lumepa Atoa Saaga.
O le Aso Faraile na te’a nei sa faatulaga e fofogaina ai lea faai’uga peita’i e le’i mae’a tapenaga a le tama’ita’i faamasino i le faai’uga le māfua’aga o le toe tolopō.
Sa tumutumu le aulagolago a ē o loo molia i fafo o le potu faamasino i Mulinuu i le Aso Faraile ua mavae, a o tālia lea faai’uga ua toe taatia atu i le faai’uga o le vaiaso nei.
Ua faailoa i taualumaga o le fofogaina o le matāupu lenei i le faai’uga o le vaiaso ua mavae o le itula e tasi i le aoauli o le Aso Faraile o lumana’i nei e aumai ai le faai’uga o le a iloa ai le faamaonia ma le lē faamaonia o moliaga a leoleo.
