Ua faamaonia mai nei le faatino ai o se fuafuaga a le malo o Ausetalia e tipoti mai i Niu Sila se tagatānuu Niu Sila, i le mae’a ai o se iloiloga mai le Komiti Iloilo, le Administrative Review Tribunal a Ausetalia i le matāupu a lenei alii.
O lē o loo aafia i lenei matāupu e igoa ia Falefitu Alapati Toatoalei, ua 39 nei ona tausaga, ma ua silia ma le 10 tausaga o nofosala i le toese ona o ni soligatulalafono matuiā sa ia faia i tausaga ua mavae.
Mo le silafia o Falefitu sa falepuipui i lona faalālā ai o se fana i foliga o se tagata, ave faamalosi se isi ma ia titina se’i tulou se isi foi tagata, ma ave faamalosi ai se taavale.
E lē gata i lea sa ia faatino foi gaioiga o le osofa’i o maota ma laoa o tagata.
I faamaumauga e lē o se taimi muamua foi lea ua solia ai e le alii o Falefitu le tulafono.
Ua faamauina na amata lava ona iloga lenei alii i gaioiga solitulafono i Ausetalia i le faato’ā 18 o ona tausaga, ma sa nofosala ai i le toese i le tausaga 2013, 2014 ma le 2015, peita’i e le’i umi ona faato’ā tatala mai i tua i le tausaga 2016 ae toe soli foi le tulafono e pei ona nofosala ai loa mo le silia i le 10 tausaga.
I le iloiloga na faatino e le Komiti na talosaga ai le alii 39 tausaga ina i faatumauina pea lona nofo ai i totonu o Ausetalia, peita’i e le’i talia lana talosaga, ma ua faatonu ai e le Komiti le alu ese mai ma le atunuu ona o le mata’utia ma le matuiā o ana soligatulafono.
I tala’aga o Falefitu Alapati Toatoalei, na tuua e lenei alii Niu Sila mo Ausetalia i le na o le 12 o ona tausaga.
Sa avatu o ia i Melepone mai Sini, ma e faamauina sa tele lava faafitauli na fetaia’i ma ia a o iai i Melepone.
E faapea sa tele ina faaoolima iai lē sa ia nofo ai.
Na fai ma sola lenei alii i le tele o taimi i le tele o aafiaga, ma i’u ai lava na lē uma le a’oga i le kolisi.
O i lea na amata tagofia ai loa e Falefitu le tele o fualaau faasāina ma le ‘ava malosi, i le na o le 14 o lona matua.
E ui i le umi ona iai o Falefitu i Ausetalia ma le talosaga ai o le alii e faatumauina lona iai i le atunuu ona o sootaga i aiga, ae ua faalia e le Komiti Iloilo ua o latou faia se faai’uga e tusa ma le manuia lautele o le atunuu ma tagata o loo aumau i totonu o Ausetalia, ia mautinoa le saogalemu ma malupuipuia i latou.
O le ala lea ua faalēaogāina ai le visa a Falefitu ma ua toafia nei i lalo o le vaavaaiga a le Ofisa o Femalagaa’iga poo le immigation e tālia ai le tipoti mai i Niu Sila nei.
Puna o Faamatalaga: https://www.rnz.co.nz/news/national/562123/fenz-team-sent-to-assist-with-new-south-wales-floods
