O le aso 24 lenei o Me ua atoa ai le tausaga o se tasi o tala faasolopito o faigamalo a Samoa talu ona tutoatasi, i le faatauto i lalo o le fale’ie o se vaega o sui filifilia o itumalo i le mae’a o lana palota tele, e mafua ina ua loka faitoto’a o le Maota Fono o le Palemene.
O se taimi muamua lea i le talafaasolopito o faaiuga o ni palota tetele a Samoa na filifilia ai sui usufono o itumalo ua faatauto ai i totonu o se fale’ie ma avea ai ma ogatotonugalemu o se finauga na lu’i ai i le faamasinoga a le atunuu le aloaia o lea sauniga mamalu. O lena finauga e pei ona silafia na faamaonia e le faamasinoga lona aloaia faaletulafono i le faamasinoga o talosaga apili na fofogaina i le Aso Faraile, 23 o Iulai 2021. O le iuga lea na faamautu ai ma le suia o pulegamalo a le atunuu mai le faigamalo a le vaega e puipuia aiātatau a tagata i le vaega faaupufai o le Faatuatua i le Atua Samoa ua tasi.
E 15 vaiaso mai le mae’a o le palota tele o le aso 9 o Aperila o le 2021 na feagai ai Samoa ma tulaga lē mautonu i ona upufai, ma o le tuanai o le lua masina ma vaiaso e tolu na faato’ā see atu ai le faigamalo fou e amatalia lana pulegamalo. I le sauniga i le vaveao o le aso 24 o Me o lenei tausaga ua aulia ai le tausaga talu mai mea na tutupu i le faatautoga i le fale’ie, na saunoa ai le afioga i le Sa’o Faapito le afioga Fiame Naomi Mata’afa, ma ia toe faatepa le aofia na auai i le sauniga faafetai i le taeao o lenei Aso Lua i Samoa, i mea na tutupu ma tapenaga a loia a le vaega faaupufai ina ua lē taunuu le faatautoga o sui filifilia uma o le paeaiga lona 17 a le Palemene i le Maota Fono.
“O le faamaopopo mai o le tatou aiga ma le tapuaiga lē leoa, ae lagona le agaga o le Atua i le faapotopotoga lea. Ae mafaufau lava, talofa e, i lenei mea ua fai i lalo o le fale’ie. Ae tagi tagi mai la’u telefoni, ituaiga tagi foi lea pe a iai le feau. O’u tago atu tatala la’u telefoni, o le feau lea e aumai, aumai i la’u uo.
O la e aumai ai le ata, fai mai, vaai ane i le ata lea, o le ata o le uluai faatautoga o le faigamalo tutotasi o Samoa, na fai i fafo o le Maota Fono tuai, lea e pu’e mai ai le ata. A o lea ua faagasolo le sauniga lea. …e maeu lava auala e momoli mai ai pea ma faamautuina le feau, o le valaauina ma le tofia o le tatou aiga, ua saunia e le Atua, ta’ita’i mai a tatou, ta’ita’i mai se’i tatou oo i le aso lena, ta’ita’i mai ai foi tatou, tatou te taunuu mai i lenei taeao, ua tatou faamanatu ai le tausaga. E lē o le tāua o le tausaga, a o le faamanatu mai pea, e pei foi ona faamanatu mai e le afioga i le Fofoga Fetalai, faamanatu mai pea mea matagofie, mea matalasi e faia e le Alii mo i tatou. Upu ta’iala o lenei taeao, “o le Atua e su’i ma lalaga.”
O le upu su’i ma lalaga, o se upu e faasino i le tele o taimi i le itupa o tina ma tamaitai, o se gaioiga e fai e latou. O le su’i e soosoo, o le lalaga e faapena foi le tuufaatasi. Saunia e le Atua mea uma. Ma o lona atoatoa ma lona matagofie, tatou te molimauina i aso uma. O lea lo tatou aiga Faatuatua i le Atua, faafetai i le alofa o le Atua ua tatou toe potopoto mai faaleaiga, tatou te ifo i luma o le Alii ma sii le agaga faafetai, ma tatou manatua ma tatou mafaufau faatasi, i faamanuiaga ma fuafuaga ua ia faataatia mo i tatou. Manuia le asofanau muamua, o le faigamalo a le FAS!”
Se finagalo o le afioga i le tamaitai Palemia o le ta’ita’i o le vaega faaupufai o le Faatuatua i le Atua Samoa ua Tasi le afioga Fiame Naomi Mataafa i le sauniga faafetai a le pati faaupufai e faamanatu ai le faatautoina o le faigamalo filifilia i totonu o le fale’ie. O le afioga i le Fofoga Fetalai susuga Papalii Li’o Oloipola Ta’eu Masipa’u na ta’ita’i i le sauniga lotu faafetai le candle light thanks giving service a le Faatuatua i le Atua Samoa ua Tasi.
