O le faai’uga o lenei vaiaso ua toe tatala ai ofisa malaga o le kamupani vaalele o le Talofa Airways i Apia ma PagoPago i Amerika Samoa mo le faaauauina o ana galuega masani talu ona taofia malaga a le kamupani vaalele ona o vavao i puipuiga o Samoa e lua ona o le faama’i.
O le amataga o le vaiaso asau le Aso Gafua ma le Aso Lua o le a toe lele ai le vaalele o le Talofa Airways mo ana malaga faatulagaina sa masani ai, a o faia ai pea malaga a vaalele laiti Twin Otter o le Samoa Airways i le va o Samoa ma Amerika Samoa. O kamupani vaalele nei e lua o loo faia malaga i le va o Samoa e lua e le gata i uta ma faamomoli a o pasese.
O loo faaaogā le malaevaalele faavaomalo i Faleolo mo faigamalaga nei a’o tālia ai le fuafuaga a le faigamalo fou i se aso e toe tatala ai le malaevaalele i Fagalii, a o taatia ai e lē o iloa se taimi e toe faaauau ai le galuega o le malaevaalele fou i Ti’avea.
