O se tala fiafia mo le mamalu o le atunuu i le motu o Savaii, ua toe tatala nei le falemaliu i le maota gasegase o Malietoa Tanumafili II i Tuasivi, ina ua mae’a galuega na toe faaleleia ai vaega sa faaletonu o lea auaunaga tāua.

O le tāua o le toe tatala ai o lea auaunaga i le maota gasegase i Tuasivi, ona o loo maua ai e le atunuu le faamāmā avega i le totogi o falemaliu.

O le faai’uga o le vaiaso na te’a nei na molimauina ai foi le afea o le auaunaga a le soifua mālōlōina i lea lava falema’i o le malo i se fesoasoani a le Ekalesia a Iesu Keriso o le Au Paia o Aso e Gata ai, mo le vaega o le falema’i o loo gafa ma le togafitia o oloa poo nifo.

O le isi galuega sa tatala ai foi o le incinerator poo le nofoaga o se fale ua fausia faapitoa i Vaiaata, ma ua iai ma se masini e faatama’ia ai otaota tau soifua mālōlōina.

O nisi foi galuega tau soifua mālōlōina sa tatala ai i lo tatou motu lava o Savaii o galuega mo le siitia o le tumamā lautele i le maota gasegase faaitumalo i Foailalo, o faleui, fale tā’ele ma kalone lapisi.

Sa faatupe ia galuega e le polokalame o Tau suavai ma le Tumamā lautele a le faalapotopotoga o le UNICEF.

O le Minisita o le Soifua Mālōlōina ma nisi o Minisita o le Kapeneta faapea le pulega o le soifua mālōlōina sa latou molimauina ia galuega ua mae’a ma ua faaaogā e tautua ai le atunuu lautele.