O le toe tatala ai o le malaevaalele i le afioaga o Fagalii o se fuafuaga lea a le faigamalo auā le manuia lautele o le atunuu aemaise ai lava le afioaga.
O le Minisita e agatonu ma lenei atina’e, Afioga Olo Fiti Afoa Vaai na ia saunoa ai e tusa o galuega faaleleia.
“I lenei vaega muamua o le galuega mo le toe faaaogaina o Fagalii, ou te tuuina atu ai le faamaoniga i le ausia ai o tulafono ma tapulaa o malaevaalele savili faavaomalo e mautinoa ai le saogalemu ma le malupuipuia lelei o femalagaa’iga a vaalele i lenei lava malaevaalele.
“O le vaega lona lua o lenei atina’e o le toe faaopoopoina lea o lona umi o le auala sesee poo runway mo a tatou vaalele mai le 700 mita i le 800 mita ma o le a atili ai ona taoto lenei malaevalele i sona taotoga mautu ma sili atu.”
O le tau atoa sa toe faaleleia ai lenei malaevaalele faatasi ai ma le faaopoopoina o lona umi i le itu i Sisifo e tusa lea ma le $2.6 miliona tala.
“Atonu o loo tuufesili pea lo tatou atunuu o lenei atina’e ua tele faiga a taitai a lo tatou malo e faia ai ae lei iloga lava sona taoto i sona taotoga lelei.
“Peitai o lea ua faama’alo ofe atu le faamoemoe ma ua taoto lenei taiala ma fuafuaga mamao ua matuā mautu lelei ina ia mautinoa e le toe tulai mai se faaletonu mo lenei lava atina’e taua.”
O le taimi nei ua le toe faaaogaina le malaevaalele i Maota ma Asau e pei ona saunoa ai Olo ona o le tapunia o le malaevalele nei i Fagalii.
“O le upu moni e faitau fia miliona a tatou tupe sa fausia ai malaevaalele nei i Salafai ma e oo mai i le taimi nei e faitau fia foi lo outou afu liligi o loo faaalu ai pea i le tausiga o nei malaevaalele e aunoa ma se vaalele e oe agai ai aunoa ai ma se tatou tupe o toe maua mai ai.
“Ua outou maitauina le lolofi mai o vaalele i Samoa nei i se taimi muamua ua tupu ai le vaaiga lea i o tatou tagata e pei foi ona tou molimauina i le aso ananfi na amata mai ai se faigamalaga a se tasi o kamupani vaalele mai Saina.
“O le fesili, o le ā sa tatou gaioiga e faatino e sasaa mai ai manuia mai turisi i le atunuu, o le tali tapena lou lotoifale.
“Lea la e iai le malaevaalele lenei e faafaigofie ona malaga atu tagata i Savaii ma toe malaga mai auā a o lei malaga le tagata mai Upolu mo Savaii e muamua lava faatau se ipu koko a o se ipu vaisalo mai faleaiga a loomatutua a le tatou nuu, pe malaga mai foi i Salafai i Upolu e faapena foi ona faatau se niu pe taumafa se panikeke i Salelologa taumafa se moli suamalie i Asau.
“O le upu moni o le a matuā ola pisinisi i totonu o Upolu ma Savaii aemaise le toe tau faatu mai o si tatou kamupani vaalele le Samoa Airways mai lona faatafa gasegase ua malomaloa.
“E faapena foi i le Talofa Airways o loo lagolagosua i lenei lava auaunaga tāua e le gata foi i lea o auala faigofie ia ma pito ona vave e laveaiina ai soifua o o tatou tagata i Salafai pe a tili mai i le maota gasegase i Motootua.”
Saunoa Olo o le silasila loloto lea a le Malo ia faatamaoaigaina uma ona tagata.
Mo le afioaga o Fagalii ua mae’a ona fai le latou feiloaiga ma le Minisita e tusa ai o nisi vaega o le atina’e.
“O tagata faigaluega uma o lenei malaevaalele e avatu lava le faamuamua i lo tatou afioaga i galuega e talafeagai lelei.
“O le taxi stand, o le tausiga o le malaevaalele ua faapena foi ona tuuina atu i lo tatou nuu auā foi nisi tupe maua faaopoopo, o faleoloa ma fale’aiga e faapena foi o le upu moni ou te faamatuā faaamuia i lo outou afioaga, i le toe tatalaina o lenei galuega na faailo ai le agaga faafetai i le Faipule o le Itumalo aemaise le pulega a Alii ma Faipule o le afioaga ona ua toe tatalaina lenei atina’e.”
Na muai fausia le malaevaalele i Fagalii i le tausaga 1969 ma o le faigamalaga muamua na amata i le 1970 ae toe tapunia i le masina o Ianuari 2005 peitai na toe tatala ia Iulai 2009.
Na toe tapunia i le masina o Tesema 2019 ona alu ai lea o fefaasoaiga o le tofa ma le faautautaga a taitai o le Malo lea ua toe tatalaina ai lenei lava atinae.
