E selauafe tālā le tupe mai le malo ua tuuina atu i le pulega o le a’oga mo fanau e iai aafiaga tumau le Loto Taumafai, ua toe mafai ai nei ona tatala le a’oga ma faaauau le a’oa’oina o fanau o loo a’ooga ai.
Ua faailoa e le Minisita o A’oga ma Aganuu i lana fesoota’iga i upega tafa’ilagi le afioga Aiono Alec Ekeroma, o le aafia o le a’oa’oina o fanau ina ua tapuni le a’oga ona o aafiaga tau tupe e faagaioia ai, na ia tuuina atu ai e talanoaina e le Kapeneta ma faamautū ai le tuuina atu o le selauafe tālā e faaauau ai ona tatala le a’oga, ae tālia ai se fuafuaga a le malo i lana tala faatatau autū o le tupe mo le tausaga faaletupe fou 2026 i le 2027.
Sa maua e le a’oga le fesoasoani tupe mai le auaunaga a le Malo o Ausetalia e ala i le matāgaluega o le va i fafo ma fefaataua’iga a le malo, peita’i ua muta lea fesoasoani ma māfua ai aafiaga o le faaauau ona tatala o le Loto Taumafai mo le a’oa’oina o fanau e iai aafiaga tumau.
O lea a’oga na amata faavaeina i le tausaga e 1980 lea ua lelei le falea’oga na fausia e le malo o Saina, peita’i ua feagai ma lu’itau tau tupe e faagaioia ai.
E silia i le to’aselau fanau a le atunuu o loo a’ooga ai i le taimi nei.
