A o toe faasauni mai ai Winston Peters e toe momo’e faatasi ai ma lana NZ First i le palota tele o loma nei, e lē o manino i sona finagalo poo ai le pati autu e fia faaipoipo iai.
O le NZ First lea e lei palotaina e tagata o le atunuu i le palota faatoa mavae atu, ma o le Aso Toonai a o faia ai le koneferenisi faaletausaga a le NZ First i Aukilani, e lē gata o le faamanatuina o le 30 tausaga o le pati ae na faailoa ai nisi o sui fou o la latou vaega faaupufai.
A o faailoa ai ona sui fou faapea ai ma nisi o sui na o ese muamua ma o le a toe agai mai, o le fesili tele mo le pati aemaise o i latou e lagolagoina, poo fea le itu e fia alu iai auā le fausiaina o se faigamalo.
E pau le itu ua manino e lē o toe fia galue Peters ma le Labour, ma e foliga mai ai na o le National lona auala.
E lei fia talanoa mai Winston Peters e tusa ai ma lana faaiuga, pau o lea o loo mafanafana le taitai e tele lona iloa ma agavaa i taimi faapenei ua faaletonu ai le tamaoaiga auā o lea foi na saofai ai i taimi lava foi faapea i le 1997.
O le palota faapolokiki a le 1News e lei mamao atu na sau ai o le NZ First e 3%, ae o le National ma le ACT ua lua palota sosoo o laua ausia le 61 nofoa e la te osia ai se faigamalo.
