O le tamaitai mai Korea i Saute lea o loo molia i le mataupu na maua ai tino maliliu o tamaiti e toalua i ni atopau i Aukilani, o loo finau pea ia aua le faailoaina lona igoa. Sa tulai i le faamasinoga maualuga i le vaiaso talu ai mo sina taimi ma ia ta’ua ai o le a ia faamaonia lona faamaoni i le mataupu lea.
O lea tamaitai o le tina o tamaiti na toe aumai mai Korea i Saute i le mae’a o le sailiga sa faia a leoleo.
O loo ia teena ona moliaga e lua o le fasioti tagata ma ua faatulaga le faamasinoga e faia i Aukilani i le tausaga fou 2024.
O le asō na toe tuuina ai e lana loia o Chris Wilkinson Smith le talosaga ia faaauau ai pea ona taofia le faailoaina o le igoa o lea tamaitai.
O loo iai pea le sā i le faailoaina o tamaiti ae o le tamaitai e pei ona lipotia sa soifua ane i Korea i Saute, na malaga mai i Niu Sila ma maua ai lona sitiseni ae o loo faamauina i faamaumauga a le Immigration na toe agai atu i Korea i Saute i le 2018.
O loo faatalia se faaiuga a le faamasinoga i lana talosaga.
