Ua toe suia e le faigamalo ua iai nei a Ausetalia se faaiuga na faia e le faigamalo talu ai ina ia amanaia Ierusalema i Sisifo o le laumua o Isaraelu.
O le minisita o le va i fafo a Ausetalia, Penny Wong na saunoa ai i le fonotaga a le Kapeneta i le aso ananafi ma ta’ua ai o loo tumau pea ona avea Ausetalia o se uo a Isaraelu ma e lagolago foi i tagata Palesitina.
Fai mai Wong o le asō ua faamautu ai e Ausetalia lana lagolago ma o le mataupu lea o se vaega o ni fetuunaiga mo le filemu i le va o Isaraelu ma tagata Palesitina ma o le ofisa o Ausetalia e tumau pea i totonu o Tel Aviv.
I le faaiuga o le 2018 na amanaia ai e le faigamalo a Morrison le avea o West Jerusalem ma laumua o Isaraelu lea la fai mai Wong ua faapolokiki ai le faiga o le faaiuga a Morrison i le mataupu lea e ui sa teena e Morrison isi faamatalaga e faapea ua ia faia lea faaiuga ina ia manumaloina ai palota mai tagata palota Jewish i lona itumalo.
O se faaiuga na folafola e le Leipa afai e tulai mai i le malo o le a toe suia lea la ua faatino nei e le minisita o le va i fafo.
