Na faatumulia Wiri i Aukilani i le Aso Sa i toe sauniga o le faatauoloa na fasiotia i le vaiaso talu ai.
O lea na molimauina e lona aiga faanoanoa, le Palemia o Niu Sila Jacinda Ardern, sui o le malo, faapea le toatele o le komiuniti toe auniga o Janak Patel, 34 tausaga.
I lea sauniga na faamatalaina ai o lē ua maliu sa iai lo laua faamoemoega ma lana ava e faia sa laua lava pisinisi i le lumanai ma e maliu e lei atoa se lua vaiaso talu ona omai mai Hamilton i Aukilani e nonofo ai ma vaai le faleoloa lea na gaoia a o toesea ai mo ni faigamalologa le ulugalii e onaina le faleoloa.
O lē ua molia e 34 tausaga ma ua molia i le fasioti tagata e faapea o se tasi na tipoti mai Ausetalia i le amataga o le tausaga nei, ma e le o mafai ona faailoa mafuaaga na tipoti mai ai ona o aiaiga faaletulafono.
O ia lea na maua mai e leoleo i le po o le Aso Faraile mai New Lynn i Sisifo o Aukilani, e ese ai le isi toalua faaopoopo lea foi na ave e leoleo i le faaiuga o le vaiaso e fesootai ma lenei mataupu.
A o faia ai toe sauniga ananafi, o lea na foi e le gata na tapunia le tele o pisinisi laiti i Hamilton e faaaloalo mo Patel, ae o se avanoa foi ua valaau mai ai i le malo, ua tatau ona faia se suiga.
O le aso ananafi e le gata na fono ai le Kapeneta e talanoa auala o puipuiga e faafetaia’ia ai faiga solitulafono nei ae ua ta’uta’u ai foi ma le solo tetee e faatatau lava i le mataupu lenei.
