Ua talia e le Faamasinoga Maualuga le talosaga apili a loia o loo tulai mo i latou e toalima e aofia ai Samuelu ma lona toalua o Sivai, o le faipule o le Palemene le afioga Fepuleai Faimata Su’a, o Li’o Faataumalama ma Lise Marie Schmidt, ina ia lē faataunuuina le suesueina o moliaga o i latou ia i le aso 26 o le masina fou o Aokuso, ae tolopo atu i le tausaga fou.

O le faai’uga lea a le afioga i le Faamasino Sili le afioga Satiu Simativa Perese sa iloiloina le talosaga toe iloilo na lu’i ai le faai’uga a le tamaitai faamasino sinia o le faamasinoga faaitumalo le afioga Talasa Atoa Saaga, sa faatulaga ai le masina fou e valaau ai molimau a leoleo ma mau a i latou o loo molia i tuua’iga e pei o le faia o faamatalaga taufaasese, faia o faamatalaga taufaaleaga, ma le taumafai e natia le amiotonu.

O moliaga e mafua i suesuega o le faalavelave tau taavale na maliu ai le alii talavou o Tuuau i se faalavelave tau taavale i Vaitele uta.

O le a toe valaau i luma o le tamaitai faamasino sinia o le Faamasinoga Faaitumalo moliaga uma o i latou e toalima o loo molia, mo le toe sailia o se isi taimi ma se aso talafeagai e valaau ai molimau.

Ua talitonu le Faamasinoga Maualuga o le faia o le faamasinoga lenei i le masina fou, ua lē talafeagai ma tapenaga a loia i Samoa o loo tauaveina moliaga ona e iai nisi o mataupu i le Faamasinoga Maualuga e tulai ai i le masina fou aemaise e fetaui tonu ma le taimi ua faatulaga e valaau ai mau i le Faamasinoga Faaitumalo. 

I le tasi o talosaga apili a nisi e toalua o loo molia lava i lenei mataupu tau faamasinoga ina ia faasee ese le faamasino sinia mai lona tauaveina o suesuega o molimau, ua teena ma lē talia.

O lona uiga ua faaauau pea ona tauave e le afioga i le tamaitai faamasino sinia o le Faamasinoga Faaitumalo le afioga Talasa Atoa Saaga lenei mataupu i se aso o le a toe tolopo iai.