Ua toe maua ma o loo manuia le tamaititi 11 tausaga o Christopher Wilson lea na faasalalauina i televise ma leitio aemaise le social media lona tau sailia mai le aso ananafi ina ua tuua le aoga.  

O le tamaititi na mulimuli vaaia ina ua agai ese mai ma le pasi a le aoga i Annangrove i Sini ma e lei toe oo ane i lona aiga talu mai lea taimi ma amata logoina ai leoleo mo se fesoasoani.  

Sa faamatala e leoleo na amata sailiga i le afiafi ananafi peitai e lei manuia ae o le popolega ona o le mālūlū tele o loo iai le setete i le taimi nei. O le lipoti lata mai ua ta’ua ai na vaaia e se isi tagata o le atunuu le tamaititi lea o savali ane i Annangrove Road lava i le taeao analeila faato’ā te’a le ‘afa o le iva ma e leai ni manu’aga se’i vaganā ai le popolega i ni aafiaga mai le mālūlū.  

Ua ave atu i le falemai mo se siaki ma o loo faatali ai su’esu’ega a leoleo seia mae’a le siaki a foma’i. Fai mai le lipoti a le 7 News e lei iai se tupe poo se meaai na i le tamaititi i le taimi na tau sailia ai.