Ua vave ona toe sui le faaiuga a le Immigration a Niu Sila e talia le visa o le avā a le tamā Tonga ia Alamoni Langi lea e po lana vaai.

Sa lipotia ananafi e tusa ma molimau a le ulugalii i luga o tala a le 1News, e le talitonu le Immigration e moni o i laua o se ulugalii ma ona o lea ua teena le visa nofomau o le tina, o lona uiga o le tipoti.

O le salalau ai o lipoti ananafi ma o lea foi na fai mai le sooupu a le Immigration, na sa’o lava la latou faaiuga na faia, ae o lea ua toe sui le tala ma ua talia le visa 6 masina e toe nofo ai.

O le 6 masina o le visitor visa poo le tagata o loo asiasi mai ma ua fai mai ai ua talia ona o le moomia o ia e lana tane ona e po le vaai, ma o le taimi foi lea e faatalosaga ai lona avanoa nofomau.

Fai mai le loia ananafi o lea na fesootai atu le Immigration i luga o le telefoni ma o se tala fiafia tele i le ulugalii.

Maua e tala fou e lei faigofie i le ulugalii le faalautele i tua o la talosaga e oo lava i tagata o la latou komiuniti, ona o le popolega i le overstayer.