Ua toe maua foi isi ato na aumai faananā ai fualaau faasāina, methamphetamine i le malaevaalele i Aukilani.
O se faigamalaga mai Los Angeles i Amerika mo Aukilani i le Aso Lulu o lenei vaiaso na aumai ai ato nei e lua, ma e tusa ma le 36 kilokalama le methamphetamine na iai i totonu.
O loo afifi mai ai i totonu fualaau faasāina ma i le mae’a su’esu’eina na foi mai ai siaki e faamaonia o methamphetamine.
E tusa ma le $13.5 miliona tālā le tau o fualaau faasāina na maua, ma e faamauina o le lona fā ai nei o taimi ua maua ma taofia ai i le malaevaalele i Aukilani fualaau faasāina i totonu o le tolu masina muamua o lenei tausaga.
E lē o iai se igoa i ato na maua e iloa ai lē na sau ma ia, ma o loo faasolo pea su’esu’ega.
