O le Kamupani o le Petroleum Products Supplies poo le PPS ua toe manumalo i le tauofoga o le aumaia o oloa tau suauu ma penisini i Samoa mo le isi lima tausaga.

O le taunuuga lea o le tauofoga na sailia ai se kamupani na te faia lea auaunaga tāua loo faaulufale ai lea oloa e manaomia tele e atunuu o le lalolagi e aofia ai ma Samoa.

Faaalia e le Minisita o Tupe o le faiga o loo faatino ai e le Malo le aumaia o suauu ma penisinisi o loo sili atu ona lelei e mafai ai foi ona faatonutonu le soona sii o le tau o lea oloa.

Le afioga i le Minisita o Tupe, Afioga Lautimuia Afoa Uelese Vaai.

O le amataga o lenei masina fou o Iuni ua faailoa ai foi e le Minisita o Tupe le siitia o le tau o suauu ma penisinisi i Samoa.

O le penisini mai lona tau sa iai i le masina o Me e 3 tala 36 sene i le lita, ua sii i le 3 tala 46 sene i le lita.

O le suauu kiso sa 3 tala 45 sene i le lita ua sii i le 3 tala 46 sene i le lita, i le ma le kalasini ua tumau i le 3 tala 0.5 sene i le lita.