I le 30 miliona tala o le tau o le vaaleoleo o le Nafanua II e le’i lua ni tausaga na faaaogā ai ae oso i le a’au ma faaleagaina ai, o lea ua toe iai se finagalo o le Malo o Ausetalia e toe fau se isi vaaleoleo taugata ma faameaalofa mai mo Samoa.
O le mae’a o feiloaiga a le tamaitai Palemia o le Malo o Samoa le afioga Fiame Naomi Mata’afa ma le tamaitai Minisita o le Va i Fafo o Ausetalia ia Penny Wong, na faailoa lautele ai e le Minisita o se faipule o le Senate a Ausetalia lea foai, ma faailoa ai le agaga faafetai o le Palemia o le tatou atunuu i le minisita ma ta’ita’i o lea Malo.
O le po o le Aso Lulu na taunuu ai i Samoa le Minisita o le Va i Fafo o Ausetalia mo se feiloaiga ma talanoaga faavaomalo ma le ta’ita’i o le Malo o Samoa, ma o le mae’a o ia talanoaga na faailoa ai e Penny Wong, le ta’utinoga a le faigamalo o le Leipa a lona atunuu na manumalo i le palota tele a lea atunuu i se vaiaso e le’i mamao atu, o le manulauti o ana faiga faavae faavaomalo o le tuu mai atoa o le lagolago e galulue faatasi ai ma ta’ita’i o Malo o le Pasefika e aofia ai ma Samoa.
O suiga o le tau, o se tasi lea o faiga faavae a lea Malo ua latou folafola o le a matuā tuu atoa iai lo latou malosi e fesoasoani ai i atunuu o le Pasefika. O le afea o le atunuu e lea ta’ita’i o le Malo o Ausetalia na ia tauaao aloaia ai se tasi o fesoasoani a lea atunuu o masini ma isi totoga mo le Matagaluega o le Soifua Maloloina.
O se taimi o le tausaga fou ua faamoemoe e mae’a fausia ai le vaaleoleo fou ma faapena ona tapena e aumai mo le faaaogāina e le Matagaluega o Leoleo, Falepuipui ma le Ola Ttoe Fuata’ina.
O le afea o Samoa e Penny Wong o lana malaga lona lua lea i le Pasefika i le atoa o le 10 aso talu ona faatauto o le Minisita o le Va i Fafo o Ausetalia ina ua manumalo le vaega faaupufai o le Labour i le palota tele a lea atunuu. Ua talafeagai tonu foi lona afea o le atunuu ma le atoaga o le 60 tausaga o le tatou tuto’atasi, ma toe faameaalofa mai ai se isi vaaleoleo aua e tāua tele i le leoina o ogasami faatulafonoina o Samoa faapea isi galuega e mana’omia ai.
