Ua faalēaogāina ai e se faamasino Aukilani i le Faamasinoga Faaitumalo a Manukau i’uga o le faigāpalota a le pitonuu o Otara-Papatoetoe, ina ua faamaonia tuua’iga o se tasi na sao atu i gaioiga taufaasesē i le faia o palota mo lea pitonuu.
I taualumaga o le faamasinoga, na faamanino ai e le faamasino, ua fai lava sina tele o faamaumauga e lē o ōgatusa ma faamaumauga i tagata palota ma le tele o vaega ua maitauina ai le eseese o ia itu.
E pei ona ta’ua e se alii polofesa o le Iunivesite o Otago, Andrew Geddis, o se matāupu ua maitauina le telē, ma ua tauāu ina fesiligia ai le tonu o le faatinoga o faigāpalota a Otara-Papatoetoe.
I lenei matāupu ua māua ai le faia e nisi tagata o palota a isi e aunoa ma le silafia e le tagata e onaina sa’o le pepa palota (casting fraudulent votes).
O le isi feeseesea’iga na māua, i le numera o tagata na faatino a latou palota e faatusatusa atu i tagata o loo i totonu o le lola palota a lea itumalo.
Ma ona o lea faafitauli, ma le tuuina mai o le faai’uga a le faamasinoga o lea ua poloa’ia ai le toe faia o se isi faigāpalota fou mo Otara-Papatoetoe.
O lea ua faatulaga o le masina o Aperila i lona aso 9 i le tausaga fou 2026, e tatau ai ona faamae’aina ai fuafuaga uma ma ua mae’a foi ona faia le faigāpalota.
Puna o Faamatalaga: https://www.rnz.co.nz/national/programmes/nights/audio/2019017351/what-does-voter-fraud-claims-mean-for-future-of-local-body-election-voting
