Ua amata nei ona faagaioia e le Matāgaluega o Faamasinoga ma le Faafoeina o Matāupu tau Faamasinoga aiaiga o teuteuga o le faavae o le tausaga 2025, lea o le a tagofia ai e le Faamasinoga Maualuga talosaga toe iloilo e faasino i ni faai’uga a le Faamasinoga Maualuga o fanua ma suafa, ao matāupu e toe apili ai ni faai’uga a le faamasinoga o su’esu’ega muamua o le a tagofia e le faamasinoga o talosaga a lea faamasinoga a le atunuu.
Faaalia e le Ofisa Sili o lea matāgaluega e lata i le 100 matāupu sa faato’ai atu, sa mana’omia ai le toe su’esu’eina o nisi o faai’uga faapea ma talosaga moni iloiloga o nisi o faai’uga.
Peita’i sa tuai ona faagasolo ia matāupu ona sa to’alia a o faatali teuteuga o le faavae ua pasia lea ua aloa’ia lona faamamaluina ina ua aloa’ia ai e le Faamasinoga Maualuga le palota a le Fofoga Fetalai na sa’ili ai le lua vae tolu.
Susuga Papalii John Taimalelagi Afele o le Ofisa Sili o le pulega o le matāgaluega o faamasinoga ma le faafoeina o matāupu tau faamasinoga.
