Ua amata nei se faalauiloa a le Matagaluega o Puna’oa Faalenatura ma le Siosiomaga i le autu o le toe fagufagu ma faamanatu le tāua o le sao o tagata uma mo se siosiomaga saogalemu.
Ua faaigoaina lea faalauiloa o polokalame faatosina poo se public campaign o le Samoa Care poo le Samoa Alofa.
O le faalapisi o nisi i nofoaga faitele i le taulaga o se tasi o atugaluga na faaleo i le amatalia o lea polokalame faatosina, ona o loo iai pea nisi latou te lē o faaaogāina lelei kalone o loo saunia e lafo iai le otaota, aemaise lava ipu pepa pe a mae’a ona tausasami ma tali le sua.
O le amatalia o le polokalame sa folasia ai e ofisa sili lagolago o lea matagaluega a latou matafaioi ina ia faamalamalama ai a latou auaunaga mo le silafia e le atunuu.
O se tasi o ofisa sili lagolago o le Matagaluega o Puna’oa Faalenatura ma Siosiomaga i le feiloaiga ma tusitala.
O lea foi feiloaiga na faailoa ai e le ofisa sili lagolago o le vaega o loo lesitala ai fanua a latou matafaioi, ma sa maua ai le avanoa e fesiligia pe aisea ua lē mafai ai ona lesitala fanua o loo faatau mai le faalapotopotoga o eleele o Samoa, fanua ia o loo iai le aiaiga e avea o ni fanua faaleaganuu ma e lē o mafai foi ona faamaonia ai ni aitalafu poo nonogatupe.
O le feiloaiga a tusitala ma ofisa sili lagolago o le Matagaluega o Puna’oa Faalenatura ma Siosiomaga sa mafai ai foi ona faailoa nisi o vaega tāua ua i lalo o le vaaiga a lea matagaluega a le Malo, o le tulaga lea i vaomatua o le atunuu, lea sa i le vaaiga a le Matagaluega o Faatoaga ma Faigafaiva i le tele o tausaga ua mavae.
