O le tausaga e 2002 i le masina o Aperila na tapu ma faasā ai ona toe faaulu se ‘ulu vela i Niu Sila, ae o Ausetalia o le tausaga e 2014 na amata ai ona toe faataitai ona ave le ‘ulu vela i lea atunuu.
Talu mai na tausaga ua mavae, o lea faatoa tafa le finagalo o le pulega o le vaega o faatoaga ma le faaāsu poo le quarantine a le Malo o Ausetalia, e faaulufale atu le ‘ulu vela ma ‘ulu mata matua mai Samoa e auala i faamomoli ma faaoso a tagata malaga mo lea atunuu.
Ua faailoa mai e le matagaluega o faatoaga ma faigafaiva a Samoa, le tatala o lea tulaga ma faailoa ai ma aiaiga o le faaulufale i Ausetalia o le taumafa o le ‘ulu ua uma ona faavela.
O aiaiga e aofia nei e aofia ai:
• E lē manaomia se pepa faaāsu.
• E mafai ona ave ma pa’uulu ma mautinoa ua vela lelei.
• Ua na o faamomoli e lē i luga atu ma le 20 kilokalama le mamafa e mafai ona ave.
• E tatau ona faaaogā atigipusa umu fou ma mamā e teuina ai i totonu ‘ulu ua mae’a ona faavelaina lelei.
• O le a asiasia uma ‘ulu vela i le to’ai taunuu ai i Ausetalia.
• E moomia se faatagana faapitoa mo faamomoli uma e i luga atu o le 20 kilokalama lona mamafa.
• E iai aiaiga faapitoa e tatau ona faamalieina muamua pe afai e fia auina atu ‘ulu vela mo tulaga faapisinisi.
O le faalauiloaina mai o lenei fuafuaga e lē o faailoaina ai poo afea e amata ai.
O lona uiga e tāua lo tatou fai mea faalogo pea i le Matagaluega o Faatoaga ma Faigafaiva a Samoa e maua ai le aso ma le masina, ina ne’i tulioso nisi ave ni faamomoli o suavai ‘ulu poo ni pusa ‘ulu mata, ae toe vaemanua ai le faatagana ua aumai e Ausetalia.
